Jannie du Toit

Liedjieskrywer en Sanger van Afrikaanse en Nederlandse Kleinkuns

Jannie du Toit is 'n liedjieskywer, internasionale sanger en pionier in die ontwikkeling van Afrikaanse musiek.

Sedert sy beginjare as sanger op die eerste toetsuitsendings van SATV in 1975 en as lid van die Afrikaanse folkgroep TRILOGIE, het die een hoogtepunt na die ander gevolg. Die inpalm van die "Honorary Mention Prize" in die American Song Festival, het hierdie suksesvolle musiekreis behoorlik laat vlam vat.

HUIDIGE OPTREDES van Jannie sluit die volgende in:

Jannie het homself oor die afgelope paar jaar daarop toegespits om musiek van sy gunsteling-musikante, soos Jacques Brel, Jules de Corte, Koos du Plessis en Lucas Maree te sing, maar het besluit dat dit weer tyd is om op sy eerste liefde en passie te fokus – naamlik om Afrikaanse liedjies te skryf en na die verhoog te bring. Die resultaat hiervan is ’n splinternuwe album: OESJAAR2018 – al die liedjies uit Jannie se pen en saam daarmee ’n “konsert” met dieselfde titel. 

In die verhoogproduksie vertel en sing Jannie oor sy musiekloopbaan: van die wingerd wat hy persent gekry het – “hierdie wingerd is my gawe, my pasella reg van bo, hierdie wingerd daag my uit om hard te werk en vas te glo”. Hy sing oor ’n geseënde oesjaar, oor die musieklegende Christa Steyn met wie hy 25 jaar saamgewerk het, oor ’n legendariese koffiewinkel in sy voorstad, Melville en oor die passie wat ’n kunstenaar dryf om nooit op te hou skep en sing nie.  Die lied "Ons soek ’n tata" is opgedra aan een van sy grootste helde, Madiba en liedjies soos Skilder van die wolke en "Lig en donker" is egte credo’s waarin hy sy siel ontbloot. Jannie het ook ’n liefdeslied geskryf vir sy vrou Therina, met wie hy in die uitsonderlike goeie oesjaar getroud is: “Jy kyk sag”.  

In die verhoogproduksie voeg die tromspeler Theuns Botha hom by Jannie se gevestigde ensemble: Susan Mouton (tjello) en Chanie Jonker (klavier en akkordeon).


Jannie du Toit

Jannie sing Jacques Brel se beeldryke tekste in vier tale – Frans, Afrikaans, Engels en Nederlands begelei deur ’n musiekensemble van klavier, tjello en kitaar. Brel se liedkuns sal nog vir ’n lang tyd telkens weer nuut geïnterpreteer en beluister word. In hierdie program kom sy genialiteit ewe sterk na vore in al vier tale – ’n getuigskrif vir die ongeëwenaarde seggingskrag van die grootste chansonnier van die 20ste eeu.


Jannie du Toit

'n Eenman-aanbieding met teks- en musiekgrepe oor die lewensbeskouing en werk van Koos du Plessis.

Dertig jaar na sy afsterwe, word dit in hierdie verhoogproduksie duidelik hoe lewend en toepaslik sy siening van die lewe steeds bly, hoe treffend sy liedkuns. Jannie du Toit, 'n groot vriend van Du Plessis, sit hiermee sy werk voort om Koos se musiek by 'n volgende geslag te laat voortleef.


Jannie du ToitJannie du Toit

Lucas Maree se liedjies met Jannie (kitaar en sang) en Thean Kotze (kitaar, baskitaar, tromme en sang). Lucas het as liedkunstenaar min gelykes in Afrikaans. Jannie en Thean herontdek sy verbeeldingryke kyk na die lewe en laat die gehoor met persoonlike anekdotes iets beleef van sy uitsonderlike menslikheid en kreatiewe gees.


Jannie du Toit

Jannie du Toit en Susan Mouton verf met die wonderlike klankkleure wat die kombinasie van tjello, kitaar en stem kan bied. Hulle bekoor met Jannie se eie liedjies, maar ook met gunstelinge uit sy jeugjare soos die Afrikaanse kunslied, pop- en folk uit die sestiger- en sewentigerjarejare. Daarby kom werk van sy Afrikaanse en Nederlandse kollega’s maar ook musiekhelde soos die kabaretmeester Jacques Brel en enkele instrumentale werke vir tjello en kitaar wat verder sorg vir merkwaardige verskeidenheid.


Jannie du Toit

Jannie du Toit, sang en kitaar en Lochner de Kock, kospraatjie/demonstrasie en sang. 'n Luister-en-proe-allegaartjie van formaat. Die gehoor word vermaak met kosdemonstrasies, anekdotes, wenke, staaltjies en musiek uit die twee kunstenaars se reise deur hulle kos- en musiekervarings.

Lochner is jare lank reeds konsultant by Jannie se Agterplaas B&B waar hulle elke oggend gesellig met vriende uit die omgewing om die ontbyttafel kuier.


Jannie du Toit

Jannie bied weer gedurende November en Desember vanjaar ’n Kersprogram aan waarin drie sangers van Renette Bouwer se Universiteit Johannesburg koor saam met hom sing. Gabby, Sizwe en Sandile staan ook bekend as die sanggroep Breathe. Die begeleiding word waargeneem deur Susan Mouton, Jannie se gereelde tjellis en Chanie Jonker wat gereeld as pianis vir hom optree.

Die program sluit in Koos du Plessis se Gebed en Somerkersfees, liedere soos Pie Jesu en Gee ons Vrede, asook ander bekende geestelike liedere en skrifberymings deur Jannie en Christa Steyn.

Daar is benewens die begeleide werk ook a capella-sang en die program word meesal ingeskakel by die boodskap van die leraar tydens 'n erediens. Die program kan egter ook as ‘n alleenstaande Kerskonsert aangebied word.


Jannie du Toit
Jannie du Toit
agterlaas bnb
thewebman.co.za
Volg Jannie op Radio en TV

EDELWYN - 'n reeks van 13 programme oor die kleinkuns, saamgestel en aangebied deur Jannie du Toit
elke Sondagoggend om 10h05 van 6 Oktober tot 29 Desember op RSG

OESJAAR - Sondag 03 November 2019
om 10h30 op kykNET < DStv 144 >
om 11h30 op kykNET NOU < DStv 146 >

BONJOUR MONSIEUR BREL - Sondag 1 Desember 2019
om 10h30 op kykNET < DStv 144 >
om 11h30 op kykNET NOU < DStv 146 >

KIEKIES - LUCAS SE LIEDJIES (met Thean Kotze)
- Sondag 29 Desember 2019
om 10h30 op kykNET < DStv 144 >
om 11h30 op kykNET NOU < DStv 146 >

Terug na webblad